Шийдвэрийн дугаар:  Захиргааны хэргийн давж заалдах шатны шүүхийн 2023 оны 06 дугаар сарын 28-ны өдрийн 221/ШТ2023/0583 дугаар магадлал

Шийдвэрийн төлөв: Хүчин төгөлдөр болсон

2023 оны 10 дугаар сарын 16-ны өдөр, процессын хураангуй №3

       Нэхэмжлэгч “А” ХХК болон хариуцагч Төрийн худалдан авах ажиллагааны газар нарын хооронд 2021 оны 07 дугаар сарын 07-ны өдөр “2021-2023 онд ерөнхий боловсролын сургуулийн сурах бичиг хэвлэн нийлүүлэх ерөнхий гэрээ” байгуулагджээ. Гэтэл хариуцагчаас 2023 оны 04 дүгээр сарын 25-ны өдрийн А-1/1462 дугаар, 2023 оны 05 дугаар сарын 23-ны өдрийн А-1/2120 дугаар мэдэгдлүүдээр нэхэмжлэгчтэй байгуулсан ерөнхий гэрээгээ “захиалагчаас тогтоосон хугацаанд сурах бичгийг нийлүүлээгүй” гэх үндэслэлээр цуцалж, Сангийн яамны хар жагсаалт буюу тендерт орох эрхээ хязгаарлуулсан этгээдийн бүртгэлд хамруулах болсныг тус тус мэдэгдсэн байна.

      Нэхэмжлэгч “А” ХХК нь эс зөвшөөрч, Төрийн худалдан авах ажиллагааны газрын даргын 2023 оны 04 дүгээр сарын 25-ны өдрийн А-1/1462 дугаар, 2023 оны 05 дугаар сарын 23-ны өдрийн А-1/2120 дугаар мэдэгдлүүдийг хууль бус болохыг тогтоож, хүчингүй болгуулахаар маргасан байна.

ХУУЛЬ ХЭРЭГЛЭЭ, ШҮҮХИЙН ШИЙДВЭР:

     1. Анхан шатны шүүхийн шүүгчийн захирамж: Хариуцагчаас гаргасан мэдэгдлүүд нь Захиргааны ерөнхий хуулийн 37 дугаар зүйлийн 37.1[1]-т заасан захиргааны акт биш. Мөн Төрийн болон орон нутгийн өмчийн хөрөнгөөр бараа, ажил, үйлчилгээ худалдан авах тухай хуулиар Төрийн худалдан авах ажиллагааны газар болон нэхэмжлэгчийн хооронд байгуулагдсан ерөнхий гэрээний заалтыг зөрчсөнтэй холбоотой зохицуулаагүй байна. Иймд тус ерөнхий гэрээ нь иргэний эрх зүйн хүрээнд үүсэх харилцааг зохилцуулсан байх тул Иргэний хуульд заасан гэрээний эрх зүйн маргаан байна гэж дүгнэн, нэхэмжлэлийг “захиргааны хэргийн харьяаллын маргаан биш” гэх үндэслэлээр хүлээн авахаас татгалзаж шийдвэрлэжээ.

     2. Нэхэмжлэгчийн итгэмжлэгдсэн төлөөлөгчөөс: Нэхэмжлэгчээс Төрийн худалдан авах ажиллагааны газартай байгуулсан гэрээтэй холбогдуулан маргаагүй, Төрийн худалдан авах ажиллагааны газрын даргын холбогдох мэдэгдлүүдтэй маргаж байна. Мөн тус мэдэгдлүүдийн улмаас нэхэмжлэгч “А” ХХК-ийн эрх нь хязгаарлагдаж байгаа юм. Иймд анхан шатын шүүхийн шүүгчийн захирамж нь үндэслэлгүй байх тул хүчингүй болгож өгнө үү.

     3. Давж заалдах шатны шүүхээс: Төрийн худалдан авах ажиллагааны газрын даргын 2023 оны 04 дүгээр сарын 25-ны өдрийн А-1/1462 дугаар, 2023 оны 05 дугаар сарын 23-ны өдрийн А-1/2120 дугаар мэдэгдлүүд нь агуулгаараа тодорхой нэг тохиолдлыг зохицуулахаар гадагш чиглэсэн, заавал биелэгдэхээр захирамжилсан шинжтэй байх тул захиргааны акт мөн. Захиргааны хэргийн шүүх харьяалан шийдвэрлэх маргаан гэж үзнэ. (3)[2]

     4. Мөн нэхэмжлэгчээс Төрийн худалдан авах ажиллагааны газартай байгуулсан гэрээтэй холбогдуулан маргаагүй байх тул захиргааны акт биш, иргэний эрх зүйн маргаан байна хэмээн нэхэмжлэлийг хүлээн авахаас татгалзсан анхан шатны шүүхийн шүүгчийн захирамж нь хууль ёсны бөгөөд үндэслэл бүхий байх хуулийн шаардлагыг хангаагүй байна гэж давж заалдах шатны шүүх дүгнэж, анхан шатны шүүгчийн захирамжийг хүчингүй болгосон. (4)