БЯЦХАН ШҮҮГЧИД ШҮҮХИЙН ТАНХИМД "ЗӨВ БУРУУ"-Г ДЭНСЛЭВ
2026-05-04 | 31Захиргааны хэргийн давж заалдах шатны шүүх “Хүүхдэд ээлтэй шүүх” хөтөлбөрийнхөө хүрээнд Нийслэлийн гэмт хэргээс урьдчилан сэргийлэх ажлыг зохицуулах салбар зөвлөлтэй хамтран ажиллаж байна.
Энэ хүрээнд Нийслэлийн хүүхдийн 295 дугаар цэцэрлэгийн бэлтгэл бүлгийн хүүхдүүдийг шүүхийн байранд хүлээн авлаа.
Хүүхдүүд шүүгчийн нөмрөг өмсөж, алх тогшин, шүүх хуралдааны танхимтай танилцахын зэрэгцээ тоглоомын аргаар эрх зүйн анхны ойлголттой болсон юм.
Энэхүү хөтөлбөрөөрөө дамжуулан хүүхдийг багаас нь нийгмийн хэм хэмжээнд сургах, буруу зөвийн ялгааг таниулах зорилготой.
Тусгайлан бэлтгэсэн сургагч багшийн заавраар хүүхдүүд өдөр тутмын маргааныг хэрхэн шударгаар шийдвэрлэхийг тоглон суралцав.
Аялалын төгсгөлд бяцхан зочид шүүгч, цагдаа болох хүсэл мөрөөдөлтэй болсноо баяртайлан хуваалцсан бөгөөд энэ нь ирээдүйн хариуцлагатай иргэнийг төлөвшүүлэхэд чиглэсэн тус шүүхийн гуравдахь арга хэмжээ юм.
