БНХАУ-ЫН ДЭЭД ШҮҮХИЙН ДЭРГЭДЭХ ШҮҮГЧДИЙН ҮНДЭСНИЙ КОЛЛЕЖИЙН ТӨЛӨӨЛӨГЧИД ЗОЧИЛЛОО

2025-07-02    |   80

---

Захиргааны хэргийн давж заалдах шатны шүүхэд Бүгд Найрамдах Хятад Ард Улсын Дээд шүүхийн дэргэдэх Шүүгчдийн үндэсний коллежийн Дэд Ерөнхийлөгч, профессор Ху Тянь тэргүүтэй төлөөлөгчид зочиллоо.

Зочдыг тус шүүхийн Тамгын газрын дарга Д.Өнөржаргал, Нийслэл дэх Захиргааны хэргийн анхан шатны шүүхийн Тамгын газрын дарга Н.Батхүү, ШЕЗ-ийн Гадаад харилцаа, хамтын ажиллагааны газрын дарга Д.Мөнхбат болон албаны бусад хүмүүс угтан авч, шүүхийн үйл ажиллагаатай танилцуулав. 

БНХАУ-ын талаас айлчиллын бүрэлдэхүүнд Ардын дээд шүүхийн Шүүх хэргийн академийн Судалгааны газрын дарга Шиэ Вэньшөн, Шүүгчдийн үндэсний коллежийн Сургалтын менежментийн газрын дэд дарга Сяо Жэньчи, Шүүгчдийн үндэсний коллежийн Иргэний болон арилжааны хэргийн сургалт, судалгааны газрын дэд дарга, профессор Ян Сяоли, Цахим сургалтын газрын дэд дарга Лью Фан, Өвөр Монгол дахь салбарын захирал Жан Юнгуан нар багтсан юм.   

Уулзалтын үеэр Тамгын газрын дарга Д.Өнөржаргал зочдод хүндэтгэл үзүүлээд Шүүхийн ерөнхий зөвлөл, БНХАУ-ын Ардын дээд шүүхийн дэргэдэх Үндэсний шүүгчдийн коллежийн хамтарсан сургалт болон шүүхийн үйл ажиллагаатай танилцсан сайн туршлагыг Монгол Улсын шүүхийн нээлттэй, ил тод байдлыг хангах, шүүхэд итгэх иргэдийн итгэлийг нэмэгдүүлэх, эрх зүйн боловсролыг нэмэгдүүлэхдээ шүүхийн цахимжилт, шинэтгэлтэй уялдуулан өөрийн шүүхэд хэрэгжүүлсэн ажлуудаа танилцуулсан юм.

Тухайлбал, Хятадын шүүхийн сайн туршлага болох хүүхдийг 5 наснаас эхлэн шүүхтэй танилцуулж, тоглоомын аргаар буруу зөвийг танин мэдүүлэх, эрх зүйн боловсрол олгодог туршлагыг 2024 онд анх нэвтрүүлж, 2025 онд “Хүүхдэд ээлтэй шүүх” хөтөлбөр болгон өргөжүүлэн төрийн болон төрийн бус байгууллагуудтай хамтран хэрэгжүүлж буй ажил мөн шүүх хуралдааны цахим танхим байгуулсан гэх мэт олон арга хэмжээг дурдаад БНХАУ хоёр улсын шүүхийн найрсаг харилцаа, туршлага хуваалцсан хамтын ажиллагаа үр дүнтэй буйд сэтгэл хангалуун байна гэв.

Шүүгчдийн үндэсний коллежийн Дэд Ерөнхийлөгч, профессор Ху Тянь уулзалтын төгсгөлд “Та бүхнийг гадаад улсын сайн туршлагыг өөрийн шүүхэд нэвтрүүлж, үр дүнтэй ажиллаж байгааг харах сайхан байна. БНХАУ-ын шүүх ч мөн танай шүүхтэй адил ард иргэддээ үйлчилдэг ардын шүүх юм. Та бүхний ард иргэдэд хүртээмжтэй байдлаар санаачлан хэрэгжүүлж буй ажлууд бидний сэтгэлд хүрлээ. Шүүх бол иргэдэд үйлчилдэг байгууллага гэдэгтэй санал нийлж байна” хэмээн энэ үеэр сэтгэгдлээ илэрхийлсэн юм.